E lua faletalimalo o le a tatala ao lei oo ina tumutumu lo tatou atunuu i le fono a taitai o Malo o le Taupulega ma le vaiaso o le Teuila lea e muamua faagasolo ona polokalame ia Setema ao lumanai ai Oketopa o le taligamalo mo lea fono tele faavaomalo. Ua faailoa e le Pulega o Tagata Tafafao mai fafo o le masina fou o Iulai i lona aso muamua, o le a toe tatala ai le faletalimalo tele o le Sheraton Aggie Greys i Vaisigano i Apia, lea e lei toe faagaioia talu mai aafiaga o le faamai o le Koviti-19, faapea tulaga faaletonu i le toe faaolaina o se nonogatupe e 30 miliona mai le Faletupe o Atinae a le Malo o Samoa.
O le taimi nei ua umia e le Malo le 30 pasene o sea o le faletalimalo ao isi sea o loo umia ese au faipisinisi mai Saina na faatau iai le faletalimalo e i latou e ana lea meatotino. O le toe tatalaina o le Sheraton Aggie Greys hotel o le a amata lana tautua ise vaega ua maea ona faaleleia ma toe fausia e pei o potu mo malo, ma isi vaega, ae o nofoaga mo le faia o fonotaga o loo faaauau pea ona faia iai galuega mo le toe faaleleia.
O le faletalimalo ua faaigoaina o le Survivor Samoa Beach Resort ua fausia i se nofoaga ua iai se matafaga tele lauoneone i Falelatai, o le a tatalaina i le masina o Aukuso. O le nofoaga ua fausia ai lea atinae tau faletalimalo e 240 eka le telē o se fanua ua faaaoga iai, ma o le matafaga o loo iai sa pueina ai le ata faasolo lauiloa i televise i Amerika o le Survivor.
E 40 potu ma fale nofo e 2 e ta’ua o villa ma ua iai foi ma isi vaega e manaomia i pisinisi tau faletalimalo.
O le tatalaina o le Sheraton Aggie Greys Hotel ma le Survivor Samoa Beach Resort o se avanoa tāua lea mo le toe faateleina o galuega e maua i ia atinae tau tagata tafafao, o se tasi o atinae na matua olopala ana tupe maua i le taimi o le pipisi o le faamai o le Koviti-19 i le lalolagi.
