O le tafe mai o fesoasoani a le Malo o Ausetalia ua lē gata o foai tupe mo atina’e eseese o le tamaoaiga o Samoa, ae o isi auala o loo faatino ai fesoasoani a lea Malo o se paaga totino a le Malo o Samoa.

O le faai’uga o le vaiaso ua mavae na tauaao ai e le Minisita, o le Komesina ma le pulega o le Matagaluega o leoleo, falepuipui ma le toe fuata’ina se foai o vaaafi e 4 o le a fesoasoani tele i leoleo ia latou galuega laveai i le sami, aemaise o isi tiute e manaomia ai ia vaaafi.

O se fesoasoani ua auala mai i le polokalame o le puipuiga a le Malo o Ausetalia poo le Australia Defence programme.

Ua 35 tausaga o maua e le matagaluega o leoleo fesoasoani mai lea polokalame a lea malo, ma o le Komesina Maualuga o Ausetalia i lo tatou atunuu na fai ma sui o lona malo e tauaao atu ia vaaafi i le Minisita o le matagaluega o leoleo, falepuipui ma le toe fuata’ina.

O le foai pito taugata ua faamanuiaina ai Samoa i le polokalame o le puipuiga a Ausetalia o le vaaleoleo o le Nafanua o loo leoina ogasami faatulafonoina o Samoa.

O lea fesoasoani o vaa leoleo o loo maua foi e nisi o Malo o le Pasefika e pei o Tonga ma Fiti.