E tatau i sui tauva o loo finauina le tofi pulenuu o Aukilani ona manino poo le a so laua taofi i le faatutoatasi o le uafu a Aukilani.
O se tasi lenei o mataupu o loo talanoaina i le laulau a o iai le tamoega o le sailiga o se isi pulenuu o Aukilani.
O le finau a le iuni lea o loo tu malosi i lenei mataupu, o loo mafuli lana lagolago i le faatumau pea o le uafu i lalo o le Council mo le lelei o tagata Aukilani uma.
E le fou i le faalogo a tagata Aukilani le tele o tuuaiga aemaise o suesuega na faia na iloa ai le lē lelei ona pulea o le uafu, ma o le faatutoatasi i le vaai a le iuni e le o le tali lea o le faafitauli.
A o maitau ai la e le iuni felafolafoaiga o finagalo o sui tauva o loo finauina le tofi pulenuu o le aai tele, ua iloa mai ai e le o ma’oti poo fea sa’o e mafuli iai le lagolago a sui tauva.
O le Aso Toonai nei, aso 8 o Oketopa e tapunia ai palota o faigapalota faaitumalo.
