“O Moana o le Tamaitai Samoa” 

I le mae’a ai o le faitau masina talu ona saili se tasi e sili ona agavaa i le faatinoina o Moana, o lea ua filifila nei e le Disney le tamaitai o Catherine Laga’aia, o se alo tamaitai a Samoa.  

O Catherine Laga’aia e 17 tausaga le matua ma Sini Ausetalia ma o le a faapena ona ia auai atu ma le alo ta’uta’ua o Samoa i le lalolagi i ata tifaga, le susuga ia Seiuli Dwayne Johnson mo le faaaliga tele o le ata Moana (Disney live-action ‘Moana’).

I le talaaga o lenei tamaitai, o Catherine o se alo e faasino i se tasi o alii iloga i ata tifaga ia Jay Laga’aia.  

I se faatalanoaga i luga o le alaata a le CNN, na faailoa ai le agaga faagaeetia o le tamaitai o Catherine e tusa ai ma le avanoa ua ia maua.

Sa ia faasoa foi o le tamā o lona tamā e mai le afioaga o Fa’ala, Palauli i Salafai, ae o le tina o lona tamā e mai le afioaga o Leulumoega Tuai i Upolu, ma e manatu Catherine o se matati’a maoa’e lea mo ia ma o se avanoa o le a ia faalauiloa ai Samoa faapea le Atu Pasefika.  

Na ta’ua foi e lenei alo o Samoa i lena faatalanoaga, o se avanoa o le a ia faaaogā e fai ai o ia ma sui o tamaitai e foliga pei o ia.  

I le patipatia ai foi o taumafaiga a lenei alo tamaitai, na maitauina foi le auai o nisi o sui mai Niu Sila e galulue faatasi ma le tamaitai o Catherine faapea Seiuli Dwayne “The Rock” Johnson i lea faaaliga tele poo live-action o le ata tifaga o Moana ua filifila e pei ona filifilia ai se tasi o alo o Samoa, Niu Sila le tamaitai ia Frankie Adams, o se tasi ua silafia uma e le toatele i le ata faasolo a Niu Sila le Shortland Street, ma nisi o ata tifaga i Amerika, o ia o le a avea ma tina o Moana, o Sina.

O le alii Tonga mai Niu Sila ia John Tui o le a avea ma tamā o Moana, o Chief Tui, ma Rena Owen o se tamaitai Maori, e iai foi ona sootaga i Wales ma le atu Europa, o nisi ua iloga foi i Niu Sila ma atunuu i fafo i le tele o ata tifaga.  

I se faatalanoaga i le CNN ma lē o loo faauluulu iai faatinoga uma o le ata poo le live-action ia Thomas Kail, na ia faasoa ai i lona fiafia tele e feiloai atu i le tamaitai o Catherine, faapea Rena ma le tamaitai o Frankie i le tau amataina o lea faamoemoe tele.  

I se talaaga i le ata tifaga o le Moana, o se tasi lenei o ata tifaga na amata maimoa ai le toatele ina ua faalauiloa mai i le tausaga 2016, ma i famaumauga o se tasi o ata na iloga le maualuga ma e maoa’e foi le taumafaiga i galuega faatino a Disney.

E pei ona faamauina le pito i luga i le lisi o ata tifaga ua maimoa ai le toatele i Amerika poo le vaega ua ta’ua “top of the most streamed films in the US” mo le tele o tausaga.  

O le ata tifaga, o loo faamauina o se ata o loo patipatia ai atumotu eseese o le Pasefika, faapea a latou tu ma aga i fanua.  

I le faagaeetia tele o le tamā o Cathrine Laga’aia ma lona aiga, na faapena ona faasoa ai i luga o upega tafailagi poo le Instagram o latou sa’afi’afiga mo si ona afafine.

“Finally we can breathe and rejoice. God is good as my late mother Pofitu would say. Congratulations to my daughter Katie and the rest of the Moana family. Such a huge undertaking but what an adventure. Also joining my daughter and Dwayne Johnson are Auckland, New Zealander John Tui as Moana’s father, Chief Tui; Samoan-New Zealand actor Frankie Adams as Moana’s mother, Sina; and Rena Owen, who hails from Bay of Islands, New Zealand, as the revered Gramma Tala. 

O le masina o Iulai o le tausaga 2026 ua faamauina o le a faaalia aloaia ai lea faaaliga tele.