O le a lē toe lagonaina le si’ufofoga o le tamā matua ia Vaipu’ā Noa Maugatai, o lē sa tele sona sao i polokalame sa fai ai faasoa o finagalo i luga o le Radio Samoa mai le tele o tausaga, ae faapea foi i lona sao tāua sa faasoa ai i le polokalame o le Vaofilifili o Samoa i afiafi o Aso Lua taitasi o le vaiaso.

Ua lausilafia uma e le to’atele o i latou e faalogologo i faasoa nei i luga o polokalame a le Radio Samoa, o le faasoa a le tamā ia Vaipu’ā e tuusa’o mai lava e lē fefe e faaleo sona finagalo, pe lagolago pe tetee i se mataupu e faatalanoaina; ae a oo foi ina sua le toeaina e matuā mālie foi ana suāga.

O le Aso Tofi, aso 27 Mati 2025, na tuua ai le malo e le fetalaiga ia Vaipu’ā Noa Maugatai, i le 82 o tausaga o lona soifua.

Na soifua mai Vaipu’ā i le tausaga e 1942, ma e tolu masina talu ona fanau mai Vaipu’ā ae maliu loa lona tuaa tamā.

O lona tuaa tinā e sau mai Uafato i Fagaloa ae o lona tuaa tamā e sau mai le afio’aga o Vaie’e i Safata.

O le ono masina o lona matua ae toe faaipoipo lona tinā, ma o iinā na tausi ane ai lava o ia e lona tinā ma lona tamāfai, lea sa ola ane ai i Samamea i Fagaloa.

O ona mātua sa a’o’oga i le kolisi o Pesega a le Ekalesia a Iesu Keriso o le Au Paia o Aso e Gata ai, mulimuli ane ua maua avanoa faasikolasipi i le iunivesite a le BYU i Hawaii; na toe foi atu mātua ua uma a’oa’oga i le tausaga e 1938, ma filifilia ai loa e le komiti o a’oga a le Ekalesia Mamona, e la te puleaina a’oga nofotumau a le Ekalesia i Sauniatu.

O le polokalame a le Fiafia Mai o loo faafoeina e le fetalaiga Tiatia Failautusi Tiatia, sa faatalanoa ai e Tiatia le tamā ia Vaipu’ā ma ia faamatalatala auiliili ai vaega eseese o lona soifuaga mai lava i lona soifua ane ma faigaluega i Samoa, se’ia oo ina malaga mai i Niu Sila ma lona aiga.

Na faaipoipo atu Vaipu’ā i se tamaitai mai le afio’aga o Laulii ma e to’afitu le la fanau; e to’aono tama ae to’atasi lona afafine.

Na see ane le tamā ma lona aiga e nonofo i Apia ma faaa’o’oga le la fanau; mulimuli ane ua toe filifili le tamā e aumai lona aiga i Niu Sila mo se lumanai manuia.

O le polokalame mo le talanoaina o uputuu, o gafa ma soo se vaega o le gagana ma le aganuu Samoa, sa maua ai le avanoa o Vaipu’ā e auai i le laulau sa faia lea polokalame, faatasi ma nisi foi o tamālii o le atunuu.

O le Aso Faraile, aso 4 Aperila i le itula e 1pm na molimoli atu ai le sa o le tamā ia Vaipu’ā i lona maota i Magele e tofa ai ma faatasitasi ai ma si ona aiga, seia oo mai i le Aso Gafua, aso 7 Aperila o le a faia ai lona family service i le falemaliu o le Ese’s Funeral Directors, ona oo lea i le Aso Lua, aso 8 Aperila, o ona toe sauniga o le a faia foi i le nofoaga lava lea i le Ese’s Funeral Directors ma molimoli atu ai i lona oliolisaga tumau i le fanuatanu i le Manukau Memorial Garden ma faatofa atu ai i lea foi tamā iloga i le komiuniti a Samoa i Aukilani.

O le a lē galo lenei tamā i ona uiga mālie ma lana faasoa tatala sa tufa mai ai lona tomai aemaise lava i le aganuu a Samoa, sa avea o sona fiafiaga i taimi uma e maua ai lona avanoa i luga o le leitiō.

E momoli atu ai faamaisega ma faamafanafanaga a le pulega ma le aufaigaluega atoa a le Radio Samoa aemaise lana polokalame o le Vaofilifili o Samoa, i le tausi aemaise le nofoaalo a le tamā ia Vaipu’ā.
Puna o Faamatalaga: https://www.facebook.com/RadioSamoa/videos/1368045797947281