Ua amata i le vaiaso nei se galuega o loo taulamua ai le faalapotopotoga o le Nuanua o le Alofa o le faia o se iloiloga e faataoto ai le tulaga lamatia o loo iai le soifua o aiga o tagata e iai aafiaga tumau o le soifua, ona o aafiaga ma’ale’ale o le tau ma faalavelave matuiā.
O lea iloiloga e pei ona faailoa e le Nuanua o le Alofa i luga o ana auala o fesootaiga i le api o foliga, o loo amata i le motu o Upolu ma faasolo atu ai i le motu o Savaii.
O le galuega o loo faamoemoe e fesiligia uma ai tagata o le aiga i tulaga lamatia i ni faalavelave matuiā na aafia ai i totonu o le sefulu tausaga talu ai, ma aafiaga o tulaga i meatotino, o le tamaoaiga ma le siosiomaga o loo ola ma soifua ai.
E tolu aso sa faatinoina ai se a’oa’oga faapitoa mo sui o le aufaigaluega ma itutino o le faalapotopotoga o le Nuanua o le Alofa e faamalamalamaina ai le pepa fesili o le a faaaogā mo faatalanoaga, ma isi vaega tāua o le iloiloga.
Sa mafai foi ona faata’ita’i le faiga o le suesuega i le vaiaso ua mavae, ina ia mautinoa ua lava tapena le aufaigaluega mo le faatinoina o le iloiloga.
O le a agai atu le aufaigaluega i maota ma laoa o aiga o loo iai tagata e iai aafiaga tumau o le soifua.
O loo iai foi le faamoemoe i lenei galuega e faatalanoa ai se fuafuaga a aiga mo le agai i luma e tapena ai i le faaono tula’i mai o ni faalavelave matuiā.
O le iloiloga o loo faatupeina e le Care International, o se vaega o polokalame fesoasoani ina ia siitia le silafia o tagata e iai aafiaga tumau o le soifua, i aafiaga o suiga o le tau ma faalavelave matuiā.
Ua iai le fuafuaga i le mae’a o le iloiloga o le a mafai e aiga ua aofia i le iloiloga ona tapena a latou lava Fuafuaga Faatino e tali atu ai i le faaono toe tula’i mai o nisi faalavelave matuiā i le lumanai, ma o le a aofia i lea Fuafuaga Faatino manaoga ma vaega e tatau ona ave i ai le faamuamua mo tagata e iai aafiaga tumau o le soifua.
