O lea ua faamautū i se sainigalima i le va o le malo ma le auaunaga fesoasoani o le ADRA a le Ekalesia Asofitu o le Toe Afio Mai, le faamatuuina atu e le malo o se vaega tupe e ‘afa miliona poo le lima selau afe tala.
O le faamoemoe o lea seleni e faatino ai galuega fesoasoani a le faalapotopotoga o le ADRA e pei o le iloiloina o talosaga ma fausia falenofo ma falelēta’ua mo nai tagata o lo tatou atunuu o loo i se tulaga ma’ale’ale lo latou soifua ma le saogalemu o le soifua mālōlōina o fale o loo nonofo ai.
E 26 le aofa’iga o faleapitaga e aofia ai falenofo ma falelēta’ua, o loo fuafuaina e fausia mo lenei tausaga faaletupe.
O le a faatino pea galuega masani a le ADRA, e pei o le asiaina uma o aiga a o le’i tuuina a latou talosaga i totonu.
E faamautū uma ia vaega, ona faaoo foi lea mo le iloiloga.
Ua iai lava le komiti masani ua mae’a ona tofia e mata’itūina le faagasologa o le iloiloga o talosaga mo le polokalame.
O lenei komiti, e aofia ai sui mai le Matagaluega o Tupe, Matagaluega o Tina ma Tamaitai, Matagaluega o Galuega, Fela’ua’iga ma Atina’e Eseese, Pulega o le Suavai, Faalapotopotoga Malosiaga tau Eletise ma le ADRA.
O le tofiaina foi o matagaluega ma faalapotopotoga nei, o loo sosolo lava i vaega faaletulafono, tomai faapitoa ma auaunaga talafeagai mo le polokalame.
O vaega uma ia e faavae ai le filifiliga o aiga ua faamanuiaina e aofia ai ma le faamalieina o aiaiga e pei o le:
1. Faaletonu ma le saogalemu o fausaga o fale
2. Faaletonu apa o loo ato ai ma e tutulu le fale
3. Faaletonu le fola o le fale
4. Lē tumamā ma soifua mālōlōina le fale
5. Lē maua se vai ma le eletise
6. Laitiiti pe leai foi se tupe maua e le aiga
7. O se tamaitai poo se tinā le ulu o le aiga
8. To’atele tele tagata e nonofo i le fale e tasi
9. E iai tagata e iai aafiaga tumau o le soifua o loo nonofo ai i le ma le aiaiga lona sefulu.
10. E iai matua tausi o loo nonofo ai.
O le Minisita o le Matagaluega o Tina ma Tamaitai Atina’e o Afioaga ma Agafesoota’i le tofa Lagaaia Tiaituau Tufuga na sainia lea maliega ma sui o le ADRA i Samoa.
