O le autu o le faamanatu ai o le aso mo tupulaga talavou i le lalolagi o tomai ma agavaa o tupulaga talavou e saofaga ma gafataulimaina ai le faaleleia o le siosiomaga mo nei, taeao ma e luā.
O lenei polokalame sa faamanatuina lea e le Samoa Family Health Association lea na saunoa ai le Faatonu Sili ia Lealaiauloto Liai Siitia.
“O le upu masani o fanau o le lumanai manuia lea o le atina’eina o soo se atunuu.
“O le faamoemoe o lenei aso o le tulituli matamau lea o le silafia ma le iloa o alo ma fanau i suiga o lo latou ola tuputupu a’e.”
“Aemaise lava le vaitau lenei o le maaleale o le ola e ono aafia ai i faafitauli o le soifua fanautama manuia poo sexual reproductive health.”
“Ina ia siitia le malamalama i auala o puipuiga ia iloa ona faatino ia puipuiga e ala i le mafai ona e faia se faaiuga poo se filifiliga poto ma le atamai.”
O lenei faamoemoe ua mafai ona o le lagolagosua a se tasi o vaega a le Malo Aufaatasi le United Nations Populations Fund (U.N.F.P.A.).
O le aso 12 o Aokuso i tausaga taitasi e amanaia ai tupulaga talavou i lo latou sao i soo se atunuu.
