E lē na o le Minisita poo le Faipule o Gagaifomauga Numera 3 se tagata ua molia e leoleo, ae leai ni aiaiga e tatala ai i tua e faatali le aso e tula’i ai i le faamasinoga.

O se vaega lea o le finagalo o le Ofisa Sili o pulega o le matagaluega o faamasinoga ma le faafoeina o mataupu tau faamasinoga le Susuga Papalii John Ta’imalelagi Afele, e faamalamalama ai le mafua’aga sa lē talia ai e se tamaita’i sui lesitala, aiaiga e lua na tuuina atu e leoleo e tatala ai le Susuga Laauli Leuatea Polata’ivao Fosi Schmidt e faatali le aso 4 o le masina fou o Fepuari e valaau ai ona moliaga e sefulu i le Faamasinoga Faaitumalo.

Sa fesiligia se finagalo o Papalii ona o se lipoti ua faailoa ai e le komesina le faanoanoa o leoleo i le lē talia o aiaiga na tuuina atu i le Sui Lesitala poo le remanding officer i le Aso Faraile na te’a nei na faia ai moliaga o le Minisita o Faato’aga ma Faigafaiva.

Ua faailoa ai e le Komesina o leoleo i lea lipoti a le nusipepa o le Sunday Samoan ua ave le latou mana’o i le Loia Sili mo se talosaga i le faamasinoga mo le tuuina mai o sana poloa’iga e faia ai se taofiga faaletulafono e taofia ai le Minisita ona malaga ese ma le atunuu.

O se vaega lenei o le talanoaga ma le Ofisa Sili o Faamasinoga.

O se finagalo o le Ofisa Sili o le matagaluega o faamasinoga ma le faafoeina o mataupu tau faamasinoga le Susuga Papalii John Taimalelagi Afele i se feiloa’iga i lona ofisa i le Aso Gafua o lenei vaiaso ua toe a’e uma ai galuega a le malo.