Ua amata i le vaiaso nei polokalame faagasolo mo le sailia o se Tausala o Samoa e pei ona amata i le faalauiloaina o tamaitai e toasefulu ua sii o latou aao, e fia auai i le tauvaga o le a taualuga iai polokalame o le Teuila o lenei tausaga.
O le Aso Lua o lenei vaiaso o le a feiloai ai tamaitai tauva ma sui o fale televise, leitio ma nusipepa faapea le aufaasalalau i luga o fesootaiga faaonapo nei, mo le faia o faatalatalanoaga ma faamatala foi ni tala matagofie i o latou olaga ma tupuaga.
O le Aso Lulu o le vaiaso fou i luma maota o le malo o le a faia ai le uluai vaega o le tauvaga ma e lua vaega togia poo categories o le a faatino ai, ae o isi vaega togia uma o le a faia i le aso e sailia ai se tausala le faaiuga lea o le vaiaso asau.
O le sui Minisita o le pulega o tagata tafafao ma le matagaluega o puna’oa faalenatura ma siosiomaga le afioga Faleomavaega Titimaea Tafua na ia tatalaina le polokalame ua faalauiloa aloaia ai tamaitai tauva e toasefulu mo le sailia o se Tausala Samoa.
