O lea ua laasia e Samoa se isi matati’a i ana fuafuaga alualu mamao mo le puipuia o le siosiomaga mai suiga o le tau, e pei ona faalauiloa i le aso lona 4 o le Fono a Malo o le Taupulega, le fuafuaga a lo tatou malo e ala i le matagaluega o puna’oa faalenatura ma siosiomaga mo le puipuia o le 30 pasene o o tatou ogasami ma meaola o le gataifale.

O lea fuafuaga poo se plan, o le a puipuia ai ogasami uma faaletulafono o Samoa poo le Exclusive Economic Zone le EEZ, lea e 120 afe sikuea kilomita lona telē.

O se taumafaiga lenei ua avea ai Samoa o se tasi o atunuu laitiiti o le li’o o atunuu o le Taupulega ua na fausia sea fuafuaga, e pei ona faaalia i se pepa o faamatalaga o se faailoga tāua tele, e faatupu manatu i isi atunuu laiti ma malo malolosi o le taupulega ina ia galulue faatasi e faatino fuafuaga alualu mamao mo le faasaoina ma le puipuiga o o latou ogasami ma meaola uma o iai.

Na faaalia e le afioga Toeolesulusulu Cedric Schuster le minisita o puna’oa faalenatura ma siosiomaga, o aafiaga o gataifale ma meaola o iai ona o suiga tetele o le tau, o le faavae autū lea na fausia ai le fuafuaga a Samoa.

O lea finagalo o le minisita sa folasia i le vaiaso nei a o faagasolo folasaga a sui o atunuu o malo o le Taupulega e faatatau i le tāua o le galulue faatasi o atunuu e puipuia ogasami ma meaola o le gataifale.

Ua fetaui lea autū ma le tulaga o loo faia ai nei galuega fesoasoani mo nuu ma afioaga o loo goto ai le vaa su’esu’e a le fitafita a Niu Sila i o latou gataifale.