O le tala lata mai i galuega o loo faaauau mo le aveesea o suāuu ma isi otaota oona mai le manuao o le Manawanui ua goto uga i ogasami i Saute o Upolu, ua faailoa e le alii ofisa sinia o le fitafita o le puipuiga a Niu Sila o Commodore Andrew Brown, le faaauau pea ona sa’ili a’upega ma ututau o le manuao e se aumaulu poo divers, ae o isi ututau ma a’upega e pei o laaumalosi ua uma ona aveesea mai, ua toe faafoi atu i Niu Sila.
O se vaalele o le fitafita a Niu Sila na faia lea galuega.
Ua faaalia e lea ofisa sinia o le fitafita o le puipuiga a lea malo, o le a iai nisi o ana feiloa’iga ma sui o le Malo o Samoa i se vaiaso o i luma e faatalatalanoa ai pea le mataupu i le manuao ma nisi laasaga au i luma.
O loo faaauau ona su’eina le tulaga saogalemu o le suāsami e le nofoaga o su’esu’ega faasaienisi a Samoa le SROS, ma o lea galuega ua faia nei ta’i masina ae ua lē o toe pei o le tulaga sa faatino ai ina ua faato’ā goto le manuao ia Oketopa o le tausaga ua mavae.
O le sauniga i lalo le uati tele i Apia e faamanatu ai fitafita na maliliu i le taua le ANZAC day lea e pa’ū tonu i le aso 25 o le masina nei, o le a auai Commodore Andrew Brown ma nisi o sui o le fitafita o le malo o Niu Sila o loo i Samoa.
