Ua tapena e le Iunivesite Aoao o Samoa se faaaloalo maualuga o le faeeina atu lea o le faailoga fomai poo le Honorary Doctorate of Letters, i se tasi o tamaitai ma tina iloga o Samoa i Niu Sila ma lo tatou atunuu, e amanaia ai lona sao i le aoaoina o fanau lalovaoa a Samoa i le Iunivesite i le Papaigalagala.
O le afioga Luamanuvao Winnie Laban, e pei ona silafia o se tasi o sui o le Council poo le laulau o faatonu o le Iunivesite aoao o Samoa mo le iva tausaga lea na amata i le tausaga e 2012 e oo atu i le tausaga e 2021.
O ia foi o se tamaitai o le atunuu sa seei i le tofi faipule o le Palemene o Niu Sila mo ni tausaga.
I le pepa ua faalauiloa ai le faaaloalo a le Iunivesite Aoao o Samoa, ua ta’ua ai o le afioga Luamanuvao Winnie Laban na ia tuua le tofi faipule i le masina o Oketopa o le tausaga e 2010 ina ua tofia e avea ma Pule lagolago o le Iunivesite o Vitoria i Ueligitone Niu Sila.
O lona sao io tatou tagata i Niu Sila ma tagata Pasefika o se tasi lea o vaega tāua i le faaiuga e faaee iai le faailoga o le Honorary Doctorate of Letters.
O ia o se tasi o tagatanuu o Niu Sila na ia maua le faailoga taualoa a le Tupu Tamaitai o Peretania o le Dame Companion of the New Zealand Order of Merit.
