Ua silia nei i le to’a 20,000 fanau a le atunuu mai le 12 i le 17 tausaga le matutua ua fai o latou tui puipui muamua o le Koviti19.
O lenei fainumera ua faamauina ao faagasolo ai le galuega i le motu tele i Salafai ma e fua le numera o le fanau ua faia tui i le aofaiga e 25,000 i le 30,000 fanau o le atunuu i lea matutua e tatau ona fai o latou tui puipui o le faama’i.
O le fautuaga lea a le taitai o le atunuu le Tamaitai Palemia afioga Fiame Naomi Mataafa e alolofa le au tino matutua e tatau ona faamaea o latou tui a’o le’i maea le masina nei o Novema. O faamaumauga o le taimi nei i le vaega matutua ua faamauina ai le 95% o i latou ua fai tui puipui muamua ae 69% ua maea atoatoa tui o le Koviti.
Ua fautuaina foi e le Tamaitai Palemia matua i le ave o le latou lagolago mo le maua e o latou fanau o lea avanoa taua. Mo le taimi nei e to’a 21,060 fanau ua fai tui muamua ae to’a 3 ua atoatoa uma le faiga o tui puipui.
