Ua mae’a sainia le konekarate e faaaogā ai telehealth services i taimi o le po e leai ai se fomai i Porirua.

O lea na lipotia i le masina o Aperila le vaavaai o le soifua maloloina e suia agai i faatalanoaga e faaaogā ai telefoni ma komepiuta le faiga o loo vaaia ai le fomai i le falemai i Kenepuru, ma ua faamaonia mai o lea ua mae’a faakonekarate nei iai le kamupani a le Emergency Consult e na te faia lea auaunaga i taimi e lē mafai ai ona iai se fomai i le falemai i le va o le 10 i le po ma le 8 o le taeao o le aso e sosoo ai.

O se faiga e lei aloaia lona faaaogāina e tusa ma faamaoniga, ma e na o gasegase agavaa e mafai ona ofo iai ma e lē faamalosia foi.

O lea auaunaga e lē fou peitai o taimi o le Koviti lea na lauiloa ai.

Fai mai le faipule ia Barbara Edmonds, o lea e silia ma le 120,000 tagata o loo tautuaina e le falemai i Kenepuru ma e lē tatau ona faamoemoe i telehealth se’i vaganā ua matuai moomia lava.

Ae fai mai Dr Bryan Betty o le General Practice of New Zealand i tala a le leitio a Niu Sila, o le telehealth e fesoasoani lea i le taimi ua matuai leai ai se fomai, ma e lē o se faiga e suia ai feiloaiga o loo faia faafesagai ma le fomai.

Puna o Faamatalaga: Telehealth company called in to help with staff shortages at Porirua’s Hospital | RNZ News