O lea a iu lava ina maliu le alii talavou na fana i totonu o le taavale i Manurewa i Aukilani i le aso o le Tausaga Fou.
E 19 tausaga o le alii talavou na fana a o iai i totonu o le taavale i Addington Ave i le te’a o le tolu i le vaveao o le Aso Gafua, ma o lea na auina atu i le falemai ae mulimuli ane uma lona ola.
O le isi alii 17 tausaga sa la iai faatasi i totonu o le taavale i lea taimi o loo taofia pea i le falemai i se tulaga tigaina.
O le uma ai o le ola o le 19 tausaga a o iai i le falemai ua suesueina ai nei lenei mataupu o se tasi na faaoo iai e se isi le oti.
I molimau a aiga lata ane i le nofoaga na tupu ai, e lagona le faate’ia o i latou ma i la latou maitau i lea po o le toatele lava o tagata sa i luga o le auala o i latou na faia mea faapāpā ma e lei iai lava se mafaufau o le a tupu se mea faapea.
