O faaiuga e lua o tagi o Itumalo faapalota o Falealili No.2 ma Aana Alofi No.2 lea na fofogaina i le Aso Gafua 16 o Aukuso i le vaiaso nei lea na faamaonia ai moliaga ma ua soloia ai ma nofoa o ia itumalo lea la ua atoa iai le 7 o Itumalo o le a toe fai a latou faigapalota laiti e sailia ai ni tofi faipule o ia itumalo.
O le fa o palota laiti e mafua ai i faaiuga a le faamasinoga na muamua ona fofogaina ina ua maea ona suesueina molimau a itu auai, faamasinoga ia mai Itumalo e aofia ai Aleipata Itupa i lalo, Sagaga No.2, Falealili No.2 ma Aana Alofi No.2.
O le isi tolu o palota laiti e mo itumalo o Safata No.1 ma Safata No.2, Sagaga No.4 ma Falealupo lea ua talia e le faamasinoga maliega na toe ave ai i tua ia mataupu ae foi e toe faatino palota laiti.
O isi mataupu mai le aofaiga e 28 tagi na faaulu na sueuseina foi molimau ae ua faatumau le filifilia o sui na faasaga iai tuuaiga ina ua lē faamaonia moliaga e pei o le mataupu a Aana Alofi No.2 lea ua le mafai ona toe alu Aiono Afaese Toleafoa i le faigapalota laititi ae o loo mafai on alu le sui na tagi le afioga ia Lolomatauama Eseta Mataituli ona na faaleaogaina moliaga faasaga ia te ia.
O le mataupu mulimuli o tagi o le faigapalota lea na finau ai le itumalo a Sagaga No.1 i le va o le afioga i le faipule filifilia Loau Solamalemalo Keneti Sio o le sui foi a le HRPP ma le sui o le FAST le afioga ia Papalii Tavita Moala lea ua faaleaogaina e le faamasinoga tagi a itu uma e lua ma faatumauina ai Loau ma faipule o lea Itumalo.
I le tiami nei o lea ua tumau ai le 18 nofoa a le HRPP, 26 nofoa a le FAST ma le 7 faigapalota laiti o loo tālia nei. O loo talitali foi se iuga a le Fofoga Fetalai faasaga i sui filifilia a le HRPP lea e le’i faatautoina.
