Ua aveese ma faamaumauga a le Palemene mai lana fonotaga i le po anapo se vaega o le saunoaga faalauaitele a le ta’ita’i o le Itu Agai le susuga Tuilaepa L Sailele Malielegaoi, sa agai i le tala faatatau o le tupe, ma faatūtū lea vaega o lana saunoaga i le faigamalo ma le filifiliga o le Ofisa Sili o le matagaluega o le soifua maloloina.
Na faailoa e Tuilaepa i le Palemene e tatau ona toe silasila le Minisita o lea matagaluega i le filifiliga o lea tamalii ona e iai sana auaunaga tuma’oti o se pisinisi tau soifua maloloina.
O se tuua’iga na mafua ai ona tulai le Minisita o Faatoaga ma Faigafaiva ma tali atu i le ta’ita’i o le Itu Agai.
O le saunoaga faalauaitele foi a le ta’ita’i o le Itu Agai i le tala faatatau o le tupe na ia faamanatu ai i le faigamalo le tatau ona mulimuli ia latou folafolaga o le tufa o tupe i tagata o le poloketi o le miliona tala.
Peitai na faauilavea le Minisita o Faatoaga ma Faigafaiva ma faailoa i le susuga Tuilaepa e leai sana saunoaga i lona tulaga o ia o le fofoga o le vaega faaupufai o le Faatuatua i le Atua Samoa ua Tasi, na ia faia ai se folafolaga e tufa ni tupe o le poloketi.
Na faaalia e Laauli i lana tali i le ta’ita’i o le Itu Agai, o tupe o loo auala atu i le ta’i miliona i le tausaga mo itumalo, o loo faatupe ai fuafuaga a o le atina’e manuia o tagata o nuu ma afioaga o itumalo taitasi.
