E lua itumalo faapalota sa suesueina e le matagaluega o tupe le faaaogāina o nisi o seleni o a latou poloketi tasi le miliona tālā, ua tuuina atu nei i le ofisa o le Loia Sili a le Malo.
O le faai’uga lea a le komiti faafoe o le poloketi o loo taitaifono ai le tamaitai Minisita o le Matagaluega o Tina ma Tamaitai Atina’e o Afioaga ma Aga Fesoota’i o loo vaaia le poloketi.
Na faailoa e le minisita le afioga Mulipola Anarosa Ale Molioo i se feiloaiga ma tusitala, e iai vaega o lipoti mai ia suesuega o loo fia silasila iai le Loia Sili, o le mafuaaga lea o le tuuina atu iai o le taunuuga o ia suesuega.
O le itumalo o Lepa o le faaaogāina o le 96 afe tālā mai le uluai vaegatupe e lua selau afe o le poloketi lea ua totogi ai lisi o le ofisa o le Fono Faavae sa suesueina, ae o le itumalo palota o Faasaleleaga Numera 2 o le faaaogāina o le 175 afe tālā o loo fesiligia o seleni mo alauni ma totogi o tagata faigaluega ma sui o le komiti o le Fono Faavae.
