A o lumanai ai le Aso Faraile o le vaiaso nei e faauu ma laei ai togiga e alii ma tamaitai ua latou filifilia le tautua faaleoleo ma galuega o leoleo o le falepuipui, o lea ua mae’a ona faatauto i latou i luma o le tamaitai faamasino sinia o le faamasinoga faaitumalo, le afioga Talasa Atoa Saaga.
O lea vaega tāua ua mae’a faia ai a latou tautinoga o le a tauave o latou tiute ma le faamaoni, e aunoa ma le faaituau.
E toa 65 le aofai atoa o le vasega faauu e aofia ai leoleo e 43 ma alii ma tamaitai ofisa o le a galulue i le falepuipui e toa 22.
E 17 vaiaso poo le silia ma le fa masina o feagai i latou ma aoaoga i tiute amata o le avea ai ma leoleo poo malu o le malo.
Ua faaopoopo atu le vasega fou i leoleo ma ofisa o le falepuipui o loo galulue i le taimi nei.
Ua maua ai le isi numera e toe faatumu ai nisi o avanoa ona ua faamavae nisi, a o isi ua faamalolo. Faaalia e le sui Komesina le susuga Papalii Monalisa Tia’i Keti i le feiloaiga ma tusitala i le vaiaso na tea nei, ua siitia le tasi le afe le numera o alii ma tamaitai e galulue faaleoleo faapea i galuega i le falepuipui, ae o le taimi nei e na o le valu selau ma ona tupu o loo galulue. O le vasega faauu fou e 65 ua aofia ai tamaitai e toa 28 ma alii e 37.
