O le tapena ai o se tulafono e faasino i le saolotoga o faamatalaga poo le Freedom of Information Act, e iai le talitonuga o se tasi lea o tapenaga tāua ua lotolotoi nei i le agai o le Malo e faataua pulega lelei ma le mautali atu i le atunuu, ina ia tafiesea faiga faaalatua i totonu o soo se auaunaga a le Malo.

O le aso Faraile ua mavae na faalauiloa ai e le Komisi e pulea tagata faigaluega a le Malo le uluai faiga faavae e taofia ai faiga pi’opi’o ma pulega lē amiotonu ma faiga faaalatua. O se faiga faavae o le a lelei lona faaogaina pe a iai ma le tulafono o le saolotoga o faamatalaga, auā tasi lea o poutu tāua o pulega lelei e taofia ai faiga faaalatua.

O se isi o lagolago taua o le iai lea o se tulafono e puipuia lelei ai tagata latou te faailoa ni faiga pi’opi’o i totonu o le Malo. Ua mae’a ona sainia e Samoa le feagaiga faavaomalo e tafiesea ai faiga faaalatua, e pei ona faailoa e le taitai o le Malo le afioga i le Palemia i le faalauiloaina o le uluai faiga faavae i le tafiesea  o ia faiga mai totonu o le Malo e pei ona o le a faatuina ai se itutino latou te mata’ituina faiga faaalatua poo se Anti-corruption tribunal. O se tasi lea o ta’iala o pulega lelei o loo unaia e Malo o loo pulea faatemokalasi e pei o Samoa.