Ua faasala nei i le toese se alii i lona ta’ita’iina o ni gaioiga ma galuega o le aumaia i totonu o Niu Sila o fuālaau faasāina ma le faamoemoe e tufatufa atu i le lautele.
O se matāupu uigaese lea matāupu, ona o lenei alii o se tasi sa tipoti ese mai ma Ausetalia e toe faafoi mai i Niu Sila nei, ona o lona tafanaina o ni tagata maualuluga i se kegi i totonu o lea atunuu.
O lē ua faasala nei o le alii o Alvin Junior Tuala, o se Samoa e 48 tausaga le matua, ma o ia lea na faauluulu ma amataina le faatino ai o gaioiga o le aumaia i totonu o ‘aisa o le methamphetamine ma le fuālaau faasāina ua ta’ua o le MDMA i totonu o Niu Sila; e ala mai i ni tagata o loo galulue i totonu o ofisa o faamomoli, e aofia ai nisi mai le Kamupani o le Aramex, FedEx ma le NZ Post.
E tusa ai ma faamaumauga mai le faamasinoga e lata i le 28 kilokalama o le crystal methamphetamine, 8.5 lita o le liquid meth ma le 2.5 kilokalama o le MDMA, ma le tele o fuālaau faasāina e nanā mai i totonu o faamomoli e pei o fagu kofe, o pusa maka (permanent markers) ma nisi o pusa o meafaigaluega o belt sanders.
Faaalia i tusitusiga i luga o telefoni feavea’i, sa faaaogā auala faalilolilo poo encrypted phone messages i faaupuga eseese e faailoa ai i ana vaega, ua maua sina avanoa e aumai ai fuālaau faasāina i totonu o le atunuu.
E faapea le faia ai o ana fe’au tusitusia e faaali ai lona mimita tele e mafai e lana vaega ona faatino le galuega o le aumai o fuālaau faasāina, ma tufatufa atu ma e maua ai lava le 2 miliona o tupe pe a faatau atu i le lautele.
I talaaga o lenei alii o Alvin Junior Tuala, na tipoti ese mai ma Ausetalia i lona tafana ai o ni alii se to’alua e iai o la sootaga i se kegi tele i Sini ua faaigoaina o le Hells Angels bikie gang i le tausaga e 2012.
Na lē faamaonia lona moliaga o le fasioti tagata pa’ivalea, ae na faamaonia i le faaoo manu’a tugā i le tino (excessive self-defence causing grievous bodily harm).
Ae i le lauina ai o le faasalaga o Alvin Junior Tuala, na faailoa ai e le faamasino, Judge Kirsten Lummis, le telē o le sootaga o lenei alii i gaioiga faasolitulafono, ma o ia lea na faauluulu iai faiga nei ma o le ala lea ua faasala ai i le 10 tausaga ma le 6 masina i le falepuipui.
O le mea mata’utia o lea foi sa tatala i tua Alvin i se isi foi moliaga o lona aumaia o fuālaau faasāina.
