E to’atasi se sui sinia o le kegi a le King Cobra i totonu o Kalaiesetete ua taofia ma molia nei e leoleo, i le mae’a ai o se galuega tele a le auaunaga, e taula’i lea i le taofia o le aumaia i totonu o Canterbury o le fuālaau faasāina o le ‘asia, le methamphetamine.
O lea alii e atoa iai le to’aono o ē na taofia faatasi i osofa’iga a leoleo.
The estimated $104,000 found in possession of a man at Christchurch Airport last month.
I se pepa o faamatalaga mai le Auaunaga a Leoleo, le NZ Police na faamauina ai, i totonu o le 3 aso talu ai na faatino ai e leoleo ni osofa’iga e faaaogā ai ni pepa faataga poo search warrants e 10, i nofoaga eseese i totonu o Kalaiesetete, e aofia ai ma le nofoaga e māua na nonofo ai sui o le kegi a le Cobra King o le Addington pad.
Ua faamauina o lea na maua ai pe ā ma le kilokalama o le methamphetamine, o tino i tupe ua uma ona tuufaatasi o ni poloka, ua māua e silia ma le $100,000 lona aofa’iga.
I faamatalaga na ta’ua ai foi, na mafai ona taofia ma saisai faapagota ona o ni faamatalaga ma ni galuega na faatautaia mai le masina talu ai, o se tasi o vaega o sa’ili’iliga ma su’esu’ega a leoleo ina ua taofia faapagota se tama’ita’i Ueligitone na malaga atu i Kalaiesetete ma se avetaavale na alu atu i le malae vaalele e faatali le taunuu atu o lea tama’ita’i.
Faaalia o le galuega tele a le auaunaga na faaigoaina o le Operation Shelby ma na faatautaia ma tuufaatasia e le Police’s National Organised Crime Group ma lagolagoina e le sui o Specialist Groups mai Canterbury atoa.
Faamatala e le Ta’ita’i Leoleo Asiasi ma o se leoleo su’esu’e faapitoa – Detective Inspector Rebecca Cotton, o se galuega ua faitau masina o fai mai e pei ona amata mai lava i le tausaga e 2025, ma o le naunauta’iga lava ina ia maua ma taofia gaioiga a sui o vaega tetele o syndicate.
O ē na iai o latou masalosaloga o loo ta’imua i le aumaia i totonu o le itumalo o Canterbury o fuālaau faasāina.
I le aso 22 i Aperila na taofia faapagota ai le tama’ita’i e 47 tausaga le matua mai Lower Hutt, i lona umiaina o le fuālaau faasāina o le methamphetamine e oo atu i le 1 kilokalama lona mamafa, i lona taunuu atu ai i Kalaiesetete.
O lea lava aso, na taofia ai se alii e 41 tausaga le matua mai Upper Hutt, i lona umiaina lea poo le lata i le $104,000 o se tino i tupe.
Na taofia mai o ia e leoleo a o iai i le nofoaga e paka ai taavale.
Na molia uma i la’ua i lo la umia o fuālaau faasāina ma le faanaunauga e tufatufaina atu i tua.
Faaalia e Detective Inspector Cotton, mo i latou na taofia i le la vaiaso, e tele ni moliaga o le a molia ai e aofia ai le auai i taupulepulega ma gaioiga a vaega ua ta’ua o organised criminal group, e pei ona faamauina le oo atu lava i le 10 tausaga e nofosala ai i le to’ese le maualuga o le faasalaga, o le tasi o le taupulepule e tufatufaina atu le ‘aisa poo le methamphetamine, e pei foi ona māua e soloatoa i le falepuipui pe a faamaonia.
Ta’ua o le maua ai o nei tagata o le a telē se vaega o gaioiga a syndicate o le a faalēaogāina ai i totonu o Kalaiesetete.
Faailoa e leoleo, o le tasi o sui sinia o le kegi ua maua nei, e faapea o se tasi sa taumafai malosi e aumai fuālaau faasāina e faaaogā ai auala ma metotia ua faaigoaina o le counter surveillance ina ia ‘alofia ai le ono maua e leoleo o faiga faasolitulafono.
Ua faamauina le fiafia tele o le Ta’ita’i Leoleo Asiasi i le manuia o a latou taumafaiga e tusa ai ma lea matāupu.
Puna o Faamatalaga: https://www.police.govt.nz/news/release/senior-gang-member-arrested-police-seize-meth-cash-christchurch?ref=%2Fnews%2Fdistricts&search&cmin&cmax&fbclid=IwY2xjawSAzwtleHRuA2FlbQIxMABicmlkETFRMm01dFNuN0JpYmJBN1Joc3J0YwZhcHBfaWQQMjIyMDM5MTc4ODIwMDg5MgABHnrs9S4As3wVfMIq_r88BaK2Fbnb1vQUgBIaty_1hTIM9CCYn1ZKUF0DCVvu_aem_IG2SpPX9ktGniQLRGqPR3A
