O loo sa’ilia nei e leoleo se alii Tonga o lona suafa o Nicky Funaki e 38 tausaga le matua, ona o su’esu’ega i se tuua’iga e faapea na ave faasolitulafono pe gaoi e lea taulealea se manupapalagi poo se povi a se aiga i Salelologa i Savaii, ma o le nuu foi lea o loo maupaolo ai.
O sa’iliga o loo faia ua talosaga ai leoleo i le fesoasoani a le atunuu i ni faamatalaga i se nofoaga i se nuu o iai le alii o Nicky Funaki.
Ua faailoa ai e leoleo o loo iai pea i Samoa lea taulealea o se tagatānuu o Tonga ona ua faailoa atu e le vaega o galuega faaleoleo i solitulafono faavaomalo le Transnational Crimes Unit o loo i Samoa lona ofisa tutotonu, e le’i alu ese lea tagata ma Samoa.
O sa’iliga i le fia maua o lea tagata ua ave ai le faamanatu a leoleo i lo tatou atunuu o se solitulafono le taumafai e faalafi se tagata o loo mana’omia i ni su’esu’ega a leoleo.
Ua ave foi le fautuaga a leoleo i a Nicky Funaki ina ia oo i soo se ofisa o leoleo ma faailoa atu lona tagata.
Faaalia e leoleo na faatino e lea taulealea le gaioiga o le ave faagaoi o le povi ma alu atu ai lava.
