O le faalapotopotoga tuma’oti o le Toomaga mo ē Puapuagatia, ua iai lana auaunaga o laina telefoni e valaau fua ai soo se tasi e mana’omia se fesoasoani ma se lavea’i, e lē gata o sauāga e aafia ai, ae o faafitauli e fesoota’i ma le pule i le ola.
O lea ua faailoa e le faalapotopotoga i ana faamaumauga i le va o le tausaga 2022 ma le tausaga na te’a nei 2023 e i le va o le 10 ma le 15 pasene tagata na valaau atu i se fesoasoani ona ua iai lagona e pule i o latou soifua poo attempted suicides.
Ua faailoa lea faamaumauga a le Toomaga i le faamanatu ai e le faalapotopotoga o le aso faavaomalo e faatāua ai polokalame uma e taofia ai le pule i le ola, ma ua faaalia ai e le faalapotopotoga o se tasi lea o a latou anava tausi o le ofoina o le fesoasoani mo tagata uma e aafia i ni faafitauli ma oo ai ina osofia lagona ma ni mafaufauga e faatino lea tulaga.
O le 20 tausaga ua mavae o se tasi lea o faafitauli ogaoga i Samoa e pei ona sa faamauina ai pea le maualuga o le numela o tagata i lo tatou atunuu e fano ola ma soifua i le pule i le ola.
O i latou sa faamauina valaau mo ni fesoasoani i laina telefoni a le Toomaga i le va o le 2022 ma le 2023 o tupulaga i le va o le 18 ma le 35 tausaga le matutua.
O le Toomaga ua avea ma sui o laina telefoni o fesoota’iga faavaomalo e maua ai fautuaga i ni faafitauli e aafia ai le ola ma le soifua o tagata.
