O le aufusu e lē mafai ona faailoa atu ni o latou lipoti tau le soifua mālōlōina e faamautinoa ai e lē o iai ni o latou manu’aga, o le a lē mafai ona faataga e fusu i polokalame i le lumana’i a Fiti, o le faamatalaga lea mai le totino o loo faafoeina fusuaga i le atunuu, le Boxing Commission of Fiji.
Na saunoa le latou ta’ita’ifono o Adi Narayan i le RNZ, ua tatau ona o latou faamautū tulaga ia ma tulafono mo le saogalemu o le tama taalo ma o nisi ia o vaega o le su’esu’ega o loo faia i le mafuaaga o le maliu o le alii fusu o Ubayd Haider na maliu i le masina o Novema.
O Haider sa matapogia a o fai le la fusuaga ma Runqi Zhou i Nadi ia Oketopa ma e le’i manuia lona ta’otoga ma maliu ai. Na ta’ua mai i se taimi mulimuli ane, talu ona aafia le alii fusu na iloa ai sa taofia i le falema’i i Liverpool i Sini i le 2023 e masalomia le aafia o le faia’i tulou.
Fai mai Narayan o tulaga lava faapea e puipui iai latou ma ua alagātatau ai i soo se tama fusu ona utagia tulafono ua faamanino atu auā lo latou lava puipuiga.
Puna o Faamatalaga: https://www.rnz.co.nz/international/pacific-news/536935/boxers-without-medical-report-won-t-be-allowed-to-fight-fiji-boxing-commission
