Ua faamautu nei le fesoasoani a le Faletupe o Atina’e o Asia poo le Asian Development Bank e selau miliona ($100miliona) tala mo le fausia o se faatanoa vai tele i Alaoa.
O se galuega ua mae’a ona sailia ai finagalo o tagata ma nuu o alala tu lalata i le nofoaga o le a fausia ai le faatanoa vai, ma ua mautu foi tapenaga uma ma kamupani o le a faatinoina le galuega.
O le vaiaso nei ua sainia ai e le sui o le Faletupe o Atina’e o Asia ma le Minisita o Tupe le maliega mo le tuuina mai o lea tupe tele o se fesoasoani poo se grant mai lea faletupe.
O le galuega o le fausia o le faatanoa i Alaoa o se tasi o poloketi e fesootai i polokalame o suiga o le tau, e pei ona lagolago atu Samoa i taumafaiga uma ma isi atunuu ma faalapotopotoga faavaomalo o ana paaga totino i taumafaiga e tali atu i suiga tetele o le tau.
Ua avea ai le Minisita o Tupe le afioga Lautimuia Afoa Uelese Vaai e fai ma sui o le Malo o Samoa e momoli le faafetai i le Faletupe o Atina’e o Asia ona o le fesoasoani.
Na faailoa ai foi e le Minisita lona faagaeetia i le maliega ua sainia i le ofisa o lea faletupe ua faatūina i Samoa lea na tatala ma amata faaaogā i le masina o Fepuari o le tausaga nei.
