O le faaiuga a le faamasinoga maualuga i le aoauli nei ua faamaonia ai tuuaiga faasaga i le sui filifilia a le itumalo o Falealili No.2 o le sui foi o le HRPP le afioga Fuimaono Samuelu Te’o o le totogi tupe (bribery) ma le moliaga o le faatinoga (treating) ma e ono toe fai ai se faigapalota laititi a lea itumalo.
E le gata i lea ua faamaonia foi tuuaiga e lima o le totogi tupe (bribery) ma le faatinoga (treating) faasaga i le sui o le FAST le afioga ia Veletaloola Fuimaono. O lenei faaiuga na tuuina mai e afioga i faamasino ia Vui Clarence Nelson ma le afioga ia Lesatele Rapi Vaai o le faamasinoga maualuga.
O lona uiga o lea ua 19 nofoa a le HRPP ae o loo tumau pea le 26 a le FAST ma faigapalota laiti o loo loma nei mo nisi itumalo.
O le iuga o le faigapalota i le Aso 9 o Aperila na tulai mai ai Fuimaono Samuelu Te’o i le tulaga muamua i palota e 513 ae o le afioga ia Veletaloola sa tulaga tolu i palota e 294.
