Ua manino ma i le tali a le alii Sui Palemia o le Malo o Niu Sila ia Vaovasamanaia Winston Peters lona manatu e lē o mana’omia e Samoa se faatoesega mai le Malo o Niu Sila i le mataupu e faatatau i le vaa o le HMNZS Manawanui lea o loo goto ai nei i gataifale o le itumalo o Safata.
O lea saunoaga a Peters sa faia lea i se faatalanoaga ma tusitala ma le aufaasalalau mai Niu Sila i le malama analeila.
O lea faatalanoaga sa maua ai le avanoa o le Radio Samoa e tuliloa ai le alii Sui Palemia o ia foi lea o le Minisita o le Va i Fafo o le Malo o Niu Sila, i le mataupu lava e faatatau i le vaa ua goto.
Saunoa Vaovasamanaia e lẽ o iai sona manatu o iai se ta’ita’i o Samoa o mana’omia se faatoesega aloa’ia mai le Malo o Niu Sila.
Na ia ta’ua foi o loo malamalama tagatānuu o Samoa o loo taumafai Niu Sila e faatino galuega ma tuuina mai le tele o seleni i le tulaga o le mataupu lenei.
Ma o le taimi o faatalanoaga, ma silasila i fesoasoani e tatau ona faia.
Sa fesiligia foi pe lē o iai se fuafuaga e feiloa’i atu ia i latou i le itumalo ua aafia i le mataupu lenei i le vaa, ae na ia faailoa mai e vave tuua Samoa ma toe foi atu i Niu Sila ma ailoga e fua i le taimi.
O le taunuu mai ai foi o le Palemia o Niu Sila ananafi ma faatino ai foi se faatalanoaga ma le aufaasalalau ma le autusitala a Niu Sila, na ia ta’ua ai foi le sao tele o le Malo o Niu Sila o loo faamatuu mai mo Samoa i le fonotaga a le CHOGM, ina ua fesiligia e tusitala i le tulaga lea i se faatoesega ia Samoa.
E lē o faatagisia e le Malo o Samoa se faatoesega ae o loo manino le mana’oga o le Itumalo o Safata e tatau ona iai se taui talafeagai mo le faaleagaina o lo latou gataifale, e tatau foi i le Malo o Niu Sila ona faatoese mai ona o le mea ua tupu, ma ia aveesea le vaa mai gataifale o Safata afai e leai, o le a tilotilo i se malosiaga faaletulafono faavaomalo.
I le tausaga 2012 i le atoa ai o le 40 tausaga o le Malo Tutoatasi o Samoa na faatoese ai le Tamaitai Palemia o Niu Sila i lea taimi ia Helen Clark e tusa ai o mafatiaga o Samoa i le vaitau o le 1918 lea na oo mai ai le vaa o le Talune ma le faama’i tele na ma’umau ai soifua e fia afe o le atunuu.
Sa faatoese foi le tamaitai ia Jacinda Ardern, ma faia foi le ifoga i lona taimi na tula’i mai ai.
E lē gata i lea o le tagatavaleina o Tamasese Lealofi a o pulea ai e Niu Sila Samoa i tausaga ua mavae lea sa faatino e le Tamaitai Palemia o Helen Clark.
