O le fono a atunuu e sefulufā o Malo o le Taupulega e aofia ai Samoa o loo avea ma sui o le komiti tumau poo le standing committee a Palemene o Malo o le Taupulega, na folasia ai e Samoa se fautuaga ina ia silasila lea komiti e tuuina atu i le fono tele a Fofoga Fetalai o Palemene o Malo o le Taupulega e faia i Initia i le tausaga fou.
I le toe taliu mai ai i le atunuu o le afioga i le Fofoga Fetalai le susuga Papalii Li’o Oloipola Ta’eu Masipa’u i le mae’a o le fono a le komiti tumau a Palemene o Malo o le Taupulega, na ia faailoa ai o se tapenaga tāua ua faatino e le komiti mo mataupu i le fono e usuia ia Ianuari o le tausaga e 2026 a Fofoga Fetalai uma o atunuu e 56 o Malo o le Taupulega, e pei o le puipuiga malu o galuega a le Palemene, ma le faaaogāina e faipule o auala o fesoota’iga televavave le social media e faalauiloa ai o latou manatu.
O le tasi foi o mataupu o le tāua o le silafia e tagata o se atunuu o faamatalaga moni ma sa’o.
O le fono a Fofoga Fetalai a Palemene o Malo o le Taupulega e ta’i lua tausaga ma usuia lea o le a talimalo ai le atunuu o Initia.
