Na faamaonia e leoleo lo latou mauaina o le tolu kuata o le tone o le aisa poo le methamphetamine i se osofaiga i Aukilani i Saute i se warehouse ma ua faamauina ai o se vaega aupito tele lea o lea fualaau faasāina ua maua e leoleo.
Na faailoa ai finagalo o nisi o le ausuesue ma i latou e galulue e faaitiitia aafiaga o fualaau faasāina i Niu Sila e faapea ua faatupulaia le gaosia o le aisa ma e ono oo i se tulaga e aafia ai le komiuniti.
Ua maua lea uta tele i le mae’a o se suesuega a leoleo na faia e faatatau i le tuufaatasia o le pia i le apa ma le class A drug lea na mafua ai le uma o le ola o se alii talavou i le amataga o le tausaga nei.
O le manatu taatele ua uma taimi o le talanoa i le tai 50, 60 kilo o le aisa e maua ae o lea ua talatalanoa i le faitau selau o kilo.
Ua faailoa e le alii leoleo suesue o Glenn Baldwin i le lipoti a le Newstalk ZB e ui i le aofaiga tele o le fualaau faasāina ua mauaina ae o loo iai lava le avanoa e ono sao ai nisi o apa pia ia e pei ona ta’ua e faataamilo solo ma e talitonu leoleo o lea ituaiga apa pia o loo avanoa e faatauina i Niu Sila pei o luga o upega tafailagi.
Ua fautuaina e leoleo soo se tagata o iai se apa pia lea o le honey bear house beer ia aua ne’i taumafaina ae logo vave leoleo.
