E silia ma le to’a 260 i latou o loo taulamua i le faatinoga o galuega mo puipuiga o le atunuu poo frontline workers ua maea ona fai a latou suesuega poo tests ma ua faamaonia mai e leai ma se tasi ua aafia i auga o le Koviti19. 

Na faamaonia mai lea vaega e le Ofisa Sili o le Pulega o Soifua Maloloina le afioga Leausa Dr. Take Naseri i le feiloaiga ma tusitala i le faaiuga o le vaiaso na tea nei. O i latou ia e aofia ai fomai, o tausi soifua ma le aufaigaluega o le falemai, o tagata o le Ofisa o Pepa Malaga poo le Immigration, o sui o le Ofisa o Tiute, o i latou e vaaia nofoaga o loo faanofoesea ai tagata femalagaai faapea le aufaigaluega a le Malaevaalele faavaomalo i Faleolo. 

Taua e Leausa “Na auina atu i latou i totonu mo suesuega i le Aso Faraile ma na faanofoesea ai, o le a iai pea i latou i nofoaga faanofoesea seia maea ona mataitū lelei a latou suesuega poo tests, peitai e leai se tasi o i latou ua maua i auga poo o loo negative uma a latou tests”. 

O le tulaga ua iai afai ae tumau pea le negative o suesuega a le aufaigaluega i leisi 14 aso o le a tagatagai loa i le tatala o i latou i tua.