Ua tauaofia i le vaiaso nei le faamasinoga o talosaga apili a le Faamasinoga sili a le atunuu, ua tagofia ai le apili faasaga i le faaiuga a le Faamasinoga maualuga na fofogaina i le masina o Me o le tausaga nei, lea na faamautu ai le filifilia o sui faipule faaopoopo o nofoa o tamaitai i le aiaiga e 10 pasene.

E pei ona silafia na faamautu i lea faaiuga le filifilia o le afioga Faagasealii Sapoa Feagiai, o le afioga Aliimalemanu Alofa Tuuau, ma maua ai le ono o nofoa o tamaitai, ae na filifilia ai ma le afioga Toomata Norah Leota, ua toatolu ai sui faaopoopo o tamaitai ma le toafa o faipule tamaitai na filifilia i le faaiuga o le palota tele ia Aperila o le tausaga na tea nei.

O le faaiuga o le vaiaso nei e maua ai se faaiuga o lea mataupu mai le faamasinoga o talosaga apili e pei ona toe lui ai le faaiuga ua mae’a ona faia e le faamasinoga maualuga.