O lea ua mae’a faalauiloa le ulua’i faiga faavae a le tatou malo mo le puipuia o soligatulafono ma o se taimi muamua i le talafaasolopito o le tatou malo tuto’atasi ua fausia ai lea faiga faavae i le manulauti a le malo, ia maua e le atunuu ma o tatou tagatānuu uma se Samoa saogalemu e soifua fiafia ma ola ai.

O le Ta’ita’i o le malo i le tamaitai Palemia sa ia faalauiloa le faiga faavae lenei i se sauniga i le faai’uga o le vaiaso ua mavae sa faia i le ofisa tutotonu o le Matāgaluega o Faamasinoga ma le Faafoeina o Mataupu tau Faamasinoga.

Na faaalia i le saunoaga a le Palemia, a saogalemu ma soifua fiafia o tatou tagata e tusa o le manulauti o le faiga faavae, o le a faapea ona tosina ai tagata mai fafo e asiasi mai ma faatūina pisinisi ma alāmanuia auā le una’ia o le tamaoaiga o le tatou atunuu, ma e lalago faatasi lea ma le faamua a le malo o loo faailoa i le ta’iala o le atina’e o Samoa, lea o loo apo ai le tāua o le nofo lelei, saogalemu ma le sa’olotoga o tagata uma. 

Le ta’ita’i o le Malo le afioga Fiame Naomi Mataafa i se vaega o lana saunoaga na faalauiloa aloa’ia ai le ulua’i Faiga Faavae a le Malo mo le Puipuiga o Soligatulafono, le Samoa National Crime Prevention Policy.