O le Aso Lua o lenei vaiaso na faia ai toe sauniga o le tamaitai Pule o le fale televise o le TV3 i Samoa o Aotearoa Pesamino Mayer, ina ua mae’a se taotoga faapitoa na sailia ai le mafuaaga tonu o lona maliu.
O se sauniga i le maota maliu o Pa’u Sefo i Tafaigata na faatumulia i le aufaigaluega a lea fale televise, aemaise o le aufaigaluega a le leitio Polenisia sa galue ai foi le tamaitai pule.
O le afioga i le tamaitai Palemia, le afioga Fiame Naomi Mataafa, na faatumutumu iai mamalu ma paia maualuluga i aiga na lua, o uo ma ē masani sa auai i le sauniga.
O molimau o toe sauniga e tele itu lelei ma tausaafia o le tamaitai pule, sa toe fofola e i latou na faia molimau.
Ae o se tasi o molimau o le uso o le tina o Aotearoa o se tamaitai iloga i galuega a le Malo i tausaga ua mavae ma o loo lotolotoi foi i nisi o auaunaga tuma’oti, le afioga Faamausili Dr Matagialofi Lua’iufi.
Audio cut :
Le afioga Faamausili Dr Matagialofi Lua’iufi i se vaega o lana molimau i toe sauniga o Aotearoa Pesamino Mayer, o se tamaitai faasalalau i le leitio Polenisia, sa avea foi ma pule o le TV3 i lo tatou atunuu.
O auala o fesootaiga i le api o foliga na faasalalau ai le sauniga e lea fale televise.
