Ua iai nei i lima o leoleo mo le faia o suesuega se mataupu ua laumanu’ia ai ni tuuaiga o le gaoia o ni pusaoloa tetele o loo teu ai i’a a vaa fagota asia o loo afea le uafu tele i Apia.
Ua faailoa e le Ofisa Sili o le pulega o uafu le afioga Sooalo Falelima Kuresa Sooalo, i se pepa o faamatalaga faalauaitele e to’a sefuluono tagata faigaluega o sikulati a le pulega o uafu ua faamalolo lē tumau a o faia ai suesuega a leoleo.
Ina ua maua se fesootaiga i le Ofisa Sili i le telefoni i le afiafi ananafi, na faailoa ai e Sooalo e lua ni pusaoloa o i’a o loo iai masaloga na aafia ae e faatoa manino vaega uma i le suesuega a leoleo.
Talu ai lea tulaga ua tulai mai, ua faatino e le pulega o uafu nisi o suiga i ana galuega masani i le ulufale ma le ulufafo ma le uafu tele ma ua ave ai mālū i puega i le atunuu o loo autovaa i lea nofoaga mo galuega ma isi auaunaga masani.
Ua faaalia e le Ofisa Sili, o le a iai nisi faaiuga e faatino pe a mae’a suesuega o loo faagasolo i le taimi nei.
