O se suesuega fou ua faailoa ai le faatupulaia o tagata faigaluega e feagai ma faaletonu I o latou totogi ile taimi o le faamai. O le Pulega o Iuni o tagata faigaluega poo le Council of Trade Unions poo le CTU sa faafoeina lenei suesuega I tagata faigaluega e 1500 .
O molimau a tagata faigaluega na aofia ai ile suesuega ua faamatala ai e se tasi tagata faigaluega I se supamaketi I Dunedin o lana galuega e feagai ma faamatalaga le manuia e faia atu e tagata faatau aemaise pea mumusu e fai talifofoga pe a ulufale atu ile faleoloa . O le faamatalaga a lea tagata faigaluega e le taitai ona kava e le totogi o loo totogiina ai o ia, faigata ma luitau e feagai pea ma ia ile aso I lana galuega.
Faailoa e le failautusi aoao o le CTU, Tali Williams ile One News o loo atagia mai i faamatalaga a tagata faigaluega e matuai faigata le faigaluega ile taimi o le faamai ae e le o gafatia I o latou totogi le tulaga o loo feagai ma latou ile faatinoina o galuega.
Ise tasi suesuega sa faia I le tausaga talu ai e 54 pasene o tagata faigaluega sa o latou faamatala e le o taitai gafatia e totogi o loo maua le tausiga o le soifuaga I aso taitasi, o le suesuega la I le tausaga nei ua oo atu ile 69.5 pasene o tagata faigaluega ua o latou faaailoa foi lea tulaga.
Fai mai le CTU e malamalama e moni e iai nai pisinisi ua matuai faigata lava foi ona faaauau auaunaga ona o luitau o le faamai peitai e iai isi fale faigaluega o loo iai le avanoa e mafai ona fesoasoani tele ai I nai tagata faigaluega.
