O sootaga faavaomalo o Samoa ma le Malo o Korea i Saute o se atunuu e pulea faatemokalasi, o loo mafai ai e lo tatou atunuu ona maua fesoasoani mo le auaunaga faalesoifua maloloina, o le siosiomaga ma le atinae o faatoaga.
O loo fesoasoani foi lea Malo i le faagaioia o aoaoga mo le faalauteleina o tomai o o tatou tagata i tautua faatekonolosi, atinae o tatata tafafao, fefaatauaiga, pulega o uafu, le atinae o faigafaiva ma le pulea o tomai o meatotino tau fatuga poo intellectual property.
O le amataga o lenei vaiaso na faamanatu ai i Samoa le atoaga o le 50 tausaga o sootaga faavaomalo o Samoa ma lea atunuu i le Atu Asia, ma o se mafutaga na amata osia i le aso 15 o Setema o le tausaga e 1972.
O le Ofisa Sili o pulega o le matagaluega o le va i fafo ma fefaatauaiga le afioga i le faletua Peseta Noumea Simi, na ia momoli le saunoaga a le Malo i lea sauniga ma ave ai le faafetai i le sui o lea malo e faamautu i le ofisa o Korea i Saute i Ueligitone i Niu Sila, i le malaga faapitoa mai i lo tatou atunuu e faamanatu le iupeli auro o sootaga faavaomalo ma lea atunuu.
O le faafetai foi ona o le amanaia e Korea i Saute o ia sootaga ua avanoa ai ona filifilia se tasi o tamalii o le atunuu le susuga Leiataualesa Jerry Brunt e fai ma sui o lea Malo poo se honorary consul i Samoa.
O le faailogaina o le atoaga o le 50 tausaga o sootaga o Samoa ma le Malo o Korea i Saute sa faia i le faletalimalo o le Orator i Tanumapua.
