E fitu tausaga le faasalaga i le falepuipui o se tamā na faamaonia lona moliaga o le fasioti tagata pa’ivalea, ma o lea faasalaga ua toe iloilo nei e le Faamasinoga o Talosaga toe iloilo poo le Faamasinoga Apili a le Faamasinoga Maualuga, lea o loo faagasolo ana galuega i le vaiaso nei.
O le tamaitai loia o Tanya Toailoa o loo tauaveina le talosaga toe iloilo i nisi o faai’uga ua mae’a sa faasala ai nisi i lea solitulafono.
O se tasi o mataupu o loo tagofia e lea faamasinoga o loo faafoeina e faamasino e toalua mai fafo ma le afioga i le Faamasino Sili, o le talosaga apili a Lema’i Faioso Sione o loo tuli le faasalaga i le falepuipui ona o solitulafono ua faamaonia o le taupulepule e faaoo le maliu i lē sa avea ma Palemia.
O loo finauina e loia a Lema’i se avanoa e toe faaofi atu ai se molimau fou e lagolago ai lana tetee i le moliaga, e pei ona mae’a suesueina ma faamaonia.
O se tasi o mataupu sa faaulu i lea faamasinoga ua toe faaui i tua.
O le Aso Lua na mae’a ai galuega a le Faamasinoga o Talosaga a le Faamasinoga Maualuga ma ua faatali nei ni faai’uga o mataupu sa iloiloina.
