Ua faailoa nei e le Matagaluega o Puna’oa Faalenatura ma Siosiomaga o loo iai le Komiti Faatino o Eleele le tapena ai o se fuafuaga o le a toe faatulaga ai lisi o fanua o le Malo o loo i le vaaiga a le komiti, ma le faamutaina o lisi o fanua ua lē totogia ma o loo iai aitalafu tuua.

I se faasilasilaga a le matagaluega ua logo ai i latou o lisiina ia eleele o le Malo, e tatau ia i latou o iai ni aiatalafu ona fesootai le ofisa a o lei oo ina faatino lea fuafuaga.

O i latou uma o loo lisiina ia fanua o le Malo i Afiamalu, Aleisa, o Fogavai i le Apia Park, Laloanea, Motootua, Nuu Fou, Tafaigata, Toomatagi, Sogi, Matautu, Taumeasina, Tiavi, Salelologa, Tanumalala, Eleele Tanu, Mulinuu, Fagalii ma Moataa o loo aofia i le fuafuaga a le Komiti Faatino o Eleele.

E pei ona silafia o le Matagaluega o Puna’oa Faalenatura ma le Siosiomaga o loo iai lea komiti tau eleele o le Malo, o lona Minisita ua faasee foi iai le vaaia o le Faalapotopotoga o Eleele a Samoa le Samoa Land Corporation o loo pulea nisi eleele o le Malo.

O le toe fetuunaiga o nisi o matafaioi ma tiute o Minisita o le Kapeneta, ma le faaopoopoina o Minisita fou e toalua e pei ona faatuina ai ma se tasi o matagaluega fou ua fitoitonu i taaloga, ua see atu ai le vaaiga o le Faalapotopotoga o Eleele a Samoa i le Matagaluega o Puna’oa Faalenatura ma le Siosiomaga o loo gafa foi ma le lesitalaina o fanua.