O faaletonu i le auaunaga a le Faalapotopotoga o le Malosi Faaeletise i le motu atoa o Upolu ile lua vaiaso talu ai e oo mai lava i le taimi nei, ua faailoa e le faalapotopotoga o le isi lua vaiaso o le a faaauau ai pea ona motusia lana auaunaga ao faia galuega e faaleleia ai laina malolosi i lalo o le eleele, ma faatali ai afi eletise fou e luau a faatau mai fafo, ile fuafuaga o le a foia ai le tulaga motusia pea o le eletise.
Ua avea le lē mautonu o lea auaunaga tāua o loo manaomia e pisinisi ma aiga uma i Upolu ua toe faasoasoa ai le eletise i vaega eseese o le motu e pei o lenei Aso Gafua i Samoa o le a titina le eletise mai le 6 i le taeao e oo i le 11 ile taeao lava o le aso Gafua 17 o Mati mo se vaega ile itu i saute o Upolu e aofia ai Siumu faasolo atu ile atu Falealili, o Lotofaga ma nuu uma o le atu Aleipata e pa’ia Tiavea.
O Lefaga ma nuu uma o loo aofia i le nofoaga o iai le tele o aiga ma pisinisi i Vaitele le Industrial feeder, o le a titina le eletise mai le 6 i le afiafi e oo ile 12 o le vaeluaga o le po o le aso Gafua.
O se vaega o Matautu i Apia faasolo atu i Vaiala, o le Apia Park ma se vaega o Moataa na motusia le eletise i le afiafi o le aso Sa i le 6 i le afiafi ma ua faailoa e le faalapotopotoga o le eletise ua latou talia le sa’i o finagalo o le atunuu ae o loo taumafai ile mea e gata ai le auaunaga ina ia mafai ona maua pea le eletise ao talia ai galuega o loo faatino ma afi fou o loo aumai mai fafo.
