Ua tuuina atu le tali tetee a le avepasi o le Laumosooi lea na tupu ai le faalavelave i Malifa talu ai nei, i moliaga uma e 37 a leoleo.
O le Aso Gafua o lenei vaiaso ina ua toe faagasolo galuega a le faamasinoga na toe tulai ai Togamataimoana 35 tausaga o le matua, ma faailoa ai e lana loia lona teena o moliaga e lua o le fasioti tagata paivalea e mafua i se faalavelave tau taavale, moliaga e lua o le ave taavale faatamala ua maliliu ai ni tagata se toalua, moliaga e 31 o le ave taavale faatamala ua manunu’a ai tagata e 31, ma moliaga taitasi o le ave taavale faatalale ma le lē faautauta, ma le moliaga o le lē lesitalaina o le taavale e fasino i le pasi na aafia i le faalavelave.
Ua faaauau pea ona nofo taofia lē ua molia i le vaaiga a leoleo i le falepuipui i Tanumalala, ae ua faatonuina lana loia e tuuina atu le talosaga e tatala ai i tua mo se tali a le itu a leoleo.
O le Aso Gafua asau e tatau ona faatino ai lea tulaga ma o le aso foi lea o le a faamautu ai ma le taimi e valaau ai molimau a leoleo.
I se isi solitulafono tau taavale afi sa fofogaina i le faamasinoga maualuga, o Gafa Sione Tauafao, ua ia teena moliaga uma a leoleo e fesootai i le faalavelave tau taavale na tulai mai i se vaega o le alatele i Vailoa Faleata ma maliu ai se tamaitai Saina.
O lona teena o moliaga ua faatulaga ai o Me o le tausaga fou o le a valaau ai molimau e lagolago ai tuuaiga faasaga ia te ia.
O le a suesue ai foi ni molimau a lē ua molia e lagolago ai lana tetee.
Ua tatala o ia i tua mai le vaaiga a leoleo, ma ua faatonuina e nofo i Malie e faatali ai le taimi o lona faamasinoga.
Ua talia foi e le faamasinoga lana talosaga ina ia taofi lona toe aveina o se taavale, ma ua aiaia ai e faatoa toe iloilo lea tulaga pe a mae’a lona faamasinoga.
