Ua mae’a nei se a’oa’oga sa faatautaia ma faatupe e le polokalame a Ausetalia e siitia ai le tomai faatusitala ma faasalalau i le Pasefika le PACMAS, i le faamoemoe e tapena ai le lotoifale o alii ma tamaitai o galulue i Samoa i lea tomai faapitoa.
O le faamoemoe autū ia lelei le logologoina o le lalolagi ma lo tatou atunuu, i taualumaga ma polokalame eseese o le fono lona 76 a Malo o le Taupulega o le a usuia i o tatou laufanua i le vaiaso fou.
O se tamaitai sa galue faatusitala i auala o faasalalauga a le Malo o Ausetalia mo le tele o tausaga sa ia faatautaia lea a’oa’oga i le vaiaso nei, lea sa lagolago iai se tasi o tamalii ua loa tausaga o galue faatusitala ma faasalalau, le tofa Apulu Lance Polu.
E ui ina taoto ta’iala ma alāfua o le a tapasāina ai le faatinoga o le galuega e pei ona tapena e le komiti a le malo ua gafa ma auaunaga tau fesoota’iga ma faasalalauga o le fono, ae ua iai le talitonuga o i latou tino i matutua i le galuega i lo tatou atunuu, o le a maua le agaga o le galulue faatasi.
