O loo iai le popolega o le totogi o pakaga I le taulaga faatau a Porirua o le a taumamao ai tagata ma aafia ai pisinisi

O lea o loo manao le Porirua City Council e faapipii masini ua taua o parking meters e totogi ai le umi e paka ai taavale, ma o le tau o loo talanoaina e I le va o le $1 ma le $2, ma o nisi o nofoaga o le a paka fua mo le 30 poo le 60 minute muamua

O lea o loo paka fua taavale I le taulaga faatau o lea aai e aunoa ma se faatapulaa

Mai le Chamber of Commerce a Porirua o loo taua ai I tala a le leitio a Niu Sila, Hamish Mexted, o le a aafia ai pisinisi I lea fuafuaga ma atili mamafa ai avega ao lea foi e tau faaolaola mai le Koviti

O le mataupu lenei e le I ioe iai le toatele I nisi o faatalanoaga ma tagata lautele I tausaga ua mavae

O le a maua le tonu o lenei mataupu pe a toe fono le council a Porirua I le Aso Tofi o le vaiaso fou