E $80.4 miliona ua maua e Palau mai le malo tele o Amerika mo lana tausaga faaletupe 2025 i lalo o le maliega ua faaigoa o le COFA poo le Compact Of Free Association lea ua atoa le 30 tausaga o lona tuto’atasi i le aso muamua o le masina nei.

Ua momoli ane ai ma le faamālō a le malo tele ia Palau i lona 30 tausaga o tuto’atasi ma ua tuuina iai ia vaegatupe mo a latou fuafuaga i tausaga faaletupe o lumana’i ai.

Fai mai le sui o Amerika i lea fesoota’iga, Carmen Cantor e mitamita i le malosi o le sootaga ma Palau.

O le fesoasoani tau tupe lea e aofia ai ma le $50 miliona o le sao mai le malo tele mo le Palau Compact Trust Fund i lalo o se maliega na sainia i le 2023 aemaise o vaegatupe mo le lagolago ai o polokalame faatino a le atunuu i le itu tau a’oa’oga, soifua mālōlōina ma isi.

I lalo o nisi o fetuuna’iga ua faia o le a tuuina ane ai foi se fesoasoani i tausaga ta’itasi mo Palau seia oo i le 2043.