O le ogatotonu o lenei vaiaso le aso 4 o Oketopa i Samoa ua amata aloaia ai ona faamamalu fesuiaiga o tiute tauave o nisi o minisita o le Kapeneta ma minisita fou e toalua ua faaopoopo i le 13 sa iai muamua ua toa sefululima ai le laulau a fono a le Kapeneta e aofia ai ma le taitai o le Malo le afioga i le Palemia.

O le Matagaluega o Taaloga ma Alaga’oa mo le fiafia o tagata, o se matagaluega fou lea ua filifilia iai le Faipule o Safata 2 e avea ma ona minisita le afioga Laumatiamanu Mathew Ringo Purcell ua 55 tausaga o le soifua.

I se faatalanoaga ma le minisita na ia fofola ai nisi o fuafuaga mo le atinae o taaloga uma i le atunuu i le silasila mamao a le Malo, e tatau ona siitia i se isi tulaga maualuga taaloga.

Na ia faailoa ai foi le tulaga o taumafaiga a autaaalo a le atunuu sa masii i taaloga a le Pasefika i ni tausaga ua mavae, o loo faamauina ai i le aofaiga o pine na manumalo mai ai, e lē o agai i luga ae o loo agai i tua.

O le taui o loo ofoina atu e le Malo i tagata taaalo pe a ausia ni pine auro i taaloga faavaomalo, o se tasi lea o taumafaiga o loo uunaia ai le tulaga tausinio, peitai e lē o lava ma o se itu lea ua silasila foi iai le minisita i fuafuaga o loo tapena mo le matagaluega fou ua patino tonu lea i le atinae o taaloga ma alaga’oa mo le fiafia o tagata lautele.

Le afioga i le Minisita o le matagaluega o taaloga ma alaga’oa mo le fiafia o tagata, Afioga Laumatiamanu Mathew Ringo Purcell.

O le ofisa tutotonu o aoga i Malifa o loo faamautu ai le Minisita mo le taimi nei.