Ua faamauina e le faamasinoga le leai o se tetee a loia a leoleo i le talosaga a se taulealea e ala i lana loia, i le fia tuua lea o le atunuu e lea alii talavou, ae malaga i fafo a o taoto ai ona moliaga o le umia o nakoti poo fualaau ma laau faasāina.
O le lē teena o le talosaga e leoleo, ua talia ai e le faamasinoga le malaga i Ausetalia o le taulealea o Tautai Faletoa se’i toe foi mai ona tula’i lea i ona moliaga.
O lea faai’uga ua poloa’ina ai le loia a lē ua molia ina ia tuuina atu ni sainiga lima se lua e ta’i 10 afe tala i le saini, e faamaonia ai le toe foi mai i Samoa o Tautai e tali i moliaga ua tuua’ia ai e leoleo.
Ua poloa’ina foi e le faamasinoga le tatau ona tuuina atu e lē ua molia o le pepa o lona pasese poo le ticket, e saga faamautū ai le aso e toe taliu mai ai i le atunuu ma e saga pine faamau ai foi, e toe foi mai e tali ona moliaga.
Ua tele talosaga faapea e talia ma e toe foi mai lava i latou sa aafia i ni solitulafono e tali i o latou moliaga.
Peitai e iai foi nisi talosaga o le avanoa lea e alu atu ai lava ma talotalo faatofa mai i le faamasinoga a Samoa.
