O le fono a atunuu o le Pasifika sa usuia i le atu motu o Palau i le vaiaso ua mavae, sa auai atu iai atunuu uma o le Pasifika e ala i Minisita ma latou ofisa, lea foi sa auai atu iai ma le afioga i le Minisita o galuega tetele a le malo o Samoa ia Hon Olo Afoa Fiti Vaai ma lona ofisa, se’i auai i fetufaaina o manatu ma atina’e lelei auā le faaleleia o le suavai taumafa ae tainane o le togafitiiga o suavai lafoai i totonu o le Pasifika ina ia malupuipuia le soifua maloloina o tagata.
O le taimi muamua lenei ua usuia ai lenei fonotaga i lea itulagi ia Palau ma sa molimauina ai le auai uma o atunuu o le Pasifika i le latou foi sao i suavai o loo faaaogāina i totonu o latou atunuu.
I lea fonotaga sa filifili ai loa se atunuu e tulai mai e avea ma taitaifono o le laulau aua le faafoefoeina o mataupu mo le manuia o le suavai i totonu o atunuu taitasi.
Saunoa le afioga i le Minisita ia Olo Afoa Fiti Vaai i luga o le polokalame a le Tanoa Ava ma le afioga ia Leiataua Savea i le Aso Toonai, sa lelei mea uma i le fonotaga i le felafolafoina lea o manatu o sui taitasi, ae lei iai foi se atunuu e lei finau i lea tofiga o le taitaifono i lea faalapotopotoga, aua ua fofola uma le tele o molimau i le tulaga lelei o loo iai le suavai i totonu o latou atunuu.
Peitai ina ua mae’a le palota ma faaiuina ai o Samoa lea ua see mai i le tofi taitaifono i totonu o lea faalapotopotoga o le Pasifika.
Ua aumai se molimau ola i totonu o lea fonotaga, ma faapea mai o Samoa o loo lelei le atinaeina o lona suavai taumafa aemaise o loo malupuipuia le suavai lafoai mo le soifua maloloina o tagata.
I le faatuatuaina o le avea o Samoa ma taitaifono i lea faalapotopotoga, o loo iai le naunautaiga ina ia mafai ona faasoa atu Samoa i auala ma atinae lelei e faaleleia ai le suavai mo atunuu lautele o le Pasifika.
O le foi mai o le fonotaga a le afioga i le Minisita ia Olo Afoa Fiti Vaai mai Palau na afea ai laufanua o Aotearoa lea sa maua ai se avanoa e faasoa ai i le matagofie o le fonotaga i auala e ono faaleleia ai le suavai i totonu o Samoa, aemaise ai o se ‘ai lelei o le fono o le avea lea o Samoa ma taitaifono o lea faalapotopotoga o le Pasifika.
