Ua tuuina atu le talosaga toe iloilo a le alii o Fauena Su’a poo Sam Su’a i le Faamasinoga Maualuga e faasaga i le faaiuga a le tamaitai faamasino o Talasa Atoa Saaga lea na ia teena ai le tatala i tua o lea ulugalii.
Ma o le tamaitai loia o Vaisala Afoa na tulai mo lea ulugalii, a o tapena ai le alii loia o Lagaaia Fetu Lagaaia e tuu atu le talosaga aloaia e faaseetuāgalu ai mai le finauina o le mataupu a lea ulugalii.
E tele vaega na afua mai ai le faaiuga a le tamaitai faamasino o Talasa e faatatau i le talosaga e tatala ai lea ulugalii i tua.
O ia mafuaaga e aofia ai le tele o suafa o Sam faapea ai ma le lua o ona pepa fanau, o le taumafai lea e fesootai molimau a leoleo, faapea ai la ma le tele o moliaga o loo molia ai lea ulugalii.
O le faaiuga a le tamaitai faamasino e teena le tatala o lea ulugalii i tua na tele finagalo na lagalagā ai ma ni tuua’iga lē faavaea.
Ma na afua ai foi ona tuu atu e lea ulugalii le talosaga e faasee ese ai le tamaitai faamasino mai le toe tagofia o le la mataupu, ma o loo tālia lena talosaga poo le ā se aso e faataunuuina ai.
E lua vaiaso ua tuu atu e le Faamasinoga Maualuga i le itu a leoleo e tuu atu ai sa latou tali i le talosaga toe iloilo a Sam ma Sivai.
