Na matauina le lolofi ifo o sui o le afioga o Tapatapaō ma tagata o nuu tuaoi e molimauina le faalauiloa o fua o faaeleeleaga, o fualaauaina ma fualaau faisua ae le gata i lea o figota o le sami o nisi ia o atinae a lea afioaga. 

O le Aso Tofi 28 o Aperila na faatautaia ai lenei faalauiloa o le Talomua ma sa tapenaina e se tasi o fai faatoaga a le afioaga le susuga Fausa Sugalu Pasia. Sa iai le faamoemoe i lenei polokalame e faataunuuina i nai vaiaso ua tuanai nei peitai ona o puipuiga o vavao o le koviti sa afua ai ona toe tolopo. 

Na ave ai le faamalo a le Minisita o Faatoaga ma Faigafaiva afioga Laauli Leuatea Polataivao Schmidt iai latou uma sa tapenaina lea faamoemoe, o se unai foi lea ina ia faia faatoaga ma atinae tau faigafaiva. Na faailoa ai foi e le afioga i le Minisita o le a faaauau pea le galulue faatasi a le malo ma le afioaga o Tapatapaō e ala i atinae nei. 

Na fautuaina foi e Laauli le afioaga ina ia unai atinae Tilapia mo se isi atinae i le lumanai. O le tele o fua o faaeleeleaga ma fualaauaina na faalauiloa i lenei Talomua sa fai meaalofa ai i le i le nofoaga mo tagata matutua i Mapuifagalele i Vailele ae le gata i lea o le nofoaga o Monike (Carmelite Sisters) i Vailima.